سؤال للبنات و الشباب

السلام عليكم ورحمة الله وبركاته

شحالكم..؟؟

اليوم حطيت لكم موضوع يخص البنات والشباب ويقدرون الشباب يردون ع اسئلة البنات والعكس صحيح .. ادري انه البعض بيرد عليه بأسلوب جاف بس كلن له رايه وأنا احترم آرائكم..

الموضوع الاول(للبنات): سلبية الستر

لا يخفى على احد ما ظهر في مجتماعتنا العربية بشكل عام والخليجية بشكل خاص والاماراتية بشكل اخص من موضة حديثة في التزين بالملابس الضيجة او المفتوحة بشكل فاضح واللي تتمثل بالتنورة الضيقة او الجنس الضيق او القميص اللي ينفتح عاليه على مصراعيه ليبين زينة البنت سواء من فوقها ولا تحتها .. او ما يحصل في مجتمعنا الخيلجي والاماراتي من موضات العباة كالفراشة وغيرها من هذه العبايات المفرطة بالزينة والنقوش.. واللي تجلب انظار الرجال بطريقة لا ارادية.. ليش يا ترى؟؟ وهي اللي طلب منها الاسلام التستر والتغطي والحفاظ على نفسها من كل ما يثير الريال عليها .. هاي الالوان وهذه الضيجة تلفت انظار الريال غصبا عنه.. بعدما كانت العباة اداة للستر استوت العباة اداة للفت الانظار بالالوان الزاهية والرسومات والنقوش.. مااقصد اليميع اكيد فان اصابع اليد ما تتساوى لانه هناك من مازال يحتفظ بهذه الصفات الاسلامية في التستر.. شو رايكم وشو السبب وشو هي الحلول؟؟

الموضوع الثاني(للشباب): ايذاء البنات

في يوم من الايام و انا ماشيه في احدى المراكز التجارية اتمشى وشوي مرن عدالي بنات بسرعه واستغربت من مشيتهن ويوم اصديت اطالع اشوف شباب يلحقوهن بسرعة تقارب سرعة البنات وشوي الريال يقترب من البنت بشكل كبير ويقول لها شيء من السر وفهمت في وقتها انه كان يلهث وراها عسب يعطيها رقمه.. يمكن تكون قصة من صنع الخيال ولكنها الحقيقة المرة اللي نعيشها.. هذا الواقع اللي مانقدر نفر منه.. ليش الشباب يسوون جي؟؟ كيف يسمحون لانفسهم يسوون شرات هالشي؟؟ ما يعرفون حرمة الناس؟؟هل يا ترى هو بيرضى لو استوى هالشي لخواته ولا حد من هله..؟؟ ما يشعرون بالمذلة؟؟ شو راي البنات في هذا الموضوع وشو هي ردة الفعل؟؟ هل انت جريء.. فجاوبني اذا..

أشوف ردودكم ورايكم في الطرح..

>>> منقول <<<